kundiman[dot]net

Uuwi ako ngayong March.

Matapos ang dalawang taon, uuwi na ako ulit, para magbakasyon. January pa lang, nakabili na ako ng ticket at nakapagfile ng leave. Mula March 5-30. Halos isang buwan na rin, pwede na. Medyo naawa nga lang ako sa katrabaho ko dahil wala syang day-off ng buong March. Oh well, sabi ko, papasalubungan ko na lang sya ng Halo-halo.

January pa lang, pero fully-booked na ang schedule ko para sa March. Makikipagkita sa mga kaibigan noong elementary, HS at college; mga blogger friends; naging ka-close sa trabaho; mga kamag-anak at syempre makikipagkita sa baby ko. Ngayon pa lang, inaayos ko na ung schedule ko, para pagdating ng March, gala na lang. Pero ngayon ko lang napatunayan na kahit pala isang buwan ang iyong bakasyon, kulang pa rin. Kulang na kulang. Iba talaga kapag artista. Syempre, biro lang.

Excited na akong makita ulit si Arvin. Grabe, sa wakas, makakasama ko na sya ulit, at hindi lang usap sa YM o telepono. May balak na nga ako paguwi ko eh – gagawa kami ng videoblog at ipo-post namin dito sa kundiman. At saka gagawa ng music video. At saka magpi-picture ng uber dami. At saka – holding hands, yakap, kiss.. hay.. The possibilities are endless, dahil kasama ko na sya. Ang saya. Nasabi ko na bang excited na akong makita ko sya? Sobra.

Sa ngayon, medyo maayos na ung ibang plano, may iilan na lang na hinahanap pa ng date, oras at lugar ang meet up. At medyo nas-stress na rin ako sa pagp-plano. Sa sobrang stressed pati si Arvin eh inaaway ko na. :| Hindi ko na lang siguro masyadong iisipin ung paguwi ko. Tamang enjoy dapat. At alam ko namang after ng pamomoroblema ng mga plano eh magiging masaya ako sa March. ^^

Oo nga pala, excited na rin akong makita ang aking pamangkin. Un naman kasi ang dahilan talaga ng paguwi namin (ng kapatid ko), manganganak kasi ung asawa nya. Baby girl. Weee. Kakaexcite. Tita na ako, officially.

Ang lapit na. Ilang araw na lang. Naririnig ko na naman ang kanta ng Orange and Lemons. Na medyo iniba ko ang lyrics.

Book-reader’s block. Hindi ko alam kung may ganyang salita talaga o pauso ko lang. Book-reader’s block, isang sakit ng mambabasang tulad ko na nahihirapang maghanap ng librong magugustuhan, kahit na halos ilang oras nang nasa loob ng bookstore.

Kanina lang, nagpunta kami ng kapatid ko sa Barne’s and Noble. Naisip ko na, sakto, kailangan ko nang magbasa ng panibagong libro dahil September 2009 pa ata ung huling librong nabasa ko. Magaapat na buwan na akong walang bagong librong nagugustuhang basahin. Hindi ko alam kung kelan nagsimula ito. Dati-rati nama’y hindi ako nauubusan ng mga librong nabibili at nababasa. Hindi bumababa sa dalawang libro ang binabasa ko sa loob ng isang linggo. Hindi ko alam kung paanong nakatagal ako ng apat na buwan na walang librong nababasa o may nasisimulan pero hindi natatapos. Malala na itong sakit ko.

Wala na akong magustuhang bagong author. May bagong libro ung gusto kong author, pero hindi ko binili ung libro nya. Hindi ko feel. Wala sa mood. Hay, pati ba naman pagbabasa eh kinawawalan ko na rin ng gana? Gusto kong sisihin ung mga bagong author ngayon eh. Wala nang masyadong choices. Dahil sa nauso kasi ang mga libro tungkol sa bampira at “black magic”, halos lahat tuloy ng libro eh tungkol dun. Hindi ko na masyadong feel ung ganung kwento. Masyadong unrealistic. Masyadong predictable. Hindi rin naman ako mahilig masyado sa suspense at action, kaya hindi ko na kino-consider ung genre na un. Love story. I’m a sucker for love stories. Pero wala pa rin akong mahanap na librong magugustuhan ko talaga. Wala na ata akong pag-asa.

Tiningnan ko ang aking bookshelf. May halos 7 libro pa ata akong hindi nababasa. Ok na rin sigurong wala muna akong nabiling libro kanina, dahil ayokong madagdagan pa ung nasa listahan ko. Susubukan ko na lang muna sigurong basahin ung mga libro ko dito at hopefully eh bumalik ang interest ko sa mga kwento, sa pagbabasa.

Goodluck.

Matapos ang ilang buwan ng hindi pagsusulat ng isang blog entry, eto na naman ulit ako’t nakaharap sa post editor ng wordpress. Nakailang palit din ako sa title, at ilang minuto rin ang inabot bago ko naisulat ang unang pangungusap. Ayan, makakabuo na ako ng isang talata. Sa wakas. Mula sa blog entry na ito ay sisimulan ko nang magsulat na magmuli, ang magblog at maging isang blogger. Ang hirap kaya:P Hindi ko man masabi kung bakit ako natigil sa pagbablog ay alam ko naman kung bakit ako magbabalik. Yun ay dahil gusto ko.

Tinanggal ko na ang crossposting ng aking mga entries sa Multiply at Facebook para hindi ko na masyadong isipin na lahat ng mga sasabihin ko’y mababasa ng aking mga kakilala. Dito na lang sa blog para ang mga makakabasa’y ang mga nakakakilala lang sa akin. Kung meron pa, hehe. Basta.

Hindi man ako makapagsulat ng isang makabag-damdaming tula o mala-romantikong kwento’y ninanais ko lang na may mailabas na mga salita mula sa aking mga iniisip. Magkaroon lang ng saysay ang mga tinatype ko ngayon sa keyboard ay ok na ako, dahil alam kong hindi ko maibabalik ang lahat sa isang blog entry lang ang isang bagay na hinid ko alam kung maakakaya ko pa.

Ito ang simula.

Dumaan ang Pasko at Bagong Taon, natapos ang taong 2009, na hindi ako nagkakasakit. Naalala ko kasi noong 2008, may sakit ako habang Pasko. Goodluck naman diba? Kaya naman sobrang saya ko nitong nakaraang taon dahil nakakain ako ng madami, naka-attend ng mga Christmas Party at na-enjoy ko talaga ang Holiday Season.

Hindi ko alam na patatapusin lang pala ung Holiday Season, at tatamaan din pala ako ng sipon at ubo. :| Kahapon, tinamaan ako ng sakit. Ang saya ng bungad ng Bagong Taon sa akin. Sana lang eh hindi ako buong taong magkasakit.

Nagkasakit na nga ako, sumakto pa na malamig ang panahon. Makapal na jacket, makapal na kumot at itong makapal na stack ng tissue. Yan ang naging kaibigan ko mula kahapon hanggang ngayon. Sana lang gumaling na ako sa susunod na mga araw. *hachoo*

Ito ang aking lahok para sa ika-87 linggo ng Litratong Pinoy na may temang Makapal (Thick). Hanggang ngayon eh medyo hindi pa maganda ang pakiramdam ko. Kaya tingin ko’y mababawasan pa ang stack ng tissue na yan. Bisitahin ang lahok ng iba pang miyembro dito.